पातलेटार

                     भक्तपुर जिल्लाको दधिकोट गा.वि.स.मा पर्ने पातलेटार गाउँ मनमोहक र सुन्दर छ।

(Photo : Janak Bhatta From Google Map)

नाउँ हो पातलेटार गाउँ हो दधिकोटको
हरियाली सबैतर्फ लाग्छ स्वर्ग सामान यो।
                       १

जसरी  बस्दछन् बच्चा मातृकाको सुसाथमा
त्यसरी नै बसेको छ पहाडसित  काखमा।
                         २

वनपुष्प,लता-कुञ्ज झुल्छन् हेर पहाडमा
पवनसाथ नाच्दैछ धान सरर्र फाँटमा।
                         ३

सिर्र-सिर्र हवा चल्छ तरंग बग्छ पातको
शीत खुशी बनी हेर्छ झुल्के घाम प्रभातको।
                          ४

कालो मेघ घना बन्दै पहाडमाथि घुम्दछ
बर्साई जलको धारा धरणीधर चुम्दछ।
                          ५

प्रफुल्ल मन पारेर पातलेटार हाँस्दछ
सँगसँगै रमाएर विहङ्ग पनि नाच्दछ।
                          ६ 

गजल

नाच्छ पन्छी अहो, फुर्किएको किन ?

दुख्छ पीडा झनै,चर्किएको किन ?

                  (१) 

हुन्छ बर्षा जसै पोल्छ छाती किन ?

मेघ गर्दै गुडुङ् दर्किएको किन ?

                  (२)

जून साक्षी थिए दृष्य हेर्थे रमी 

प्रीत तोडी तिमी तर्किएको किन ?

                  (३)

बात धेरै भए रात धेरै कटे 

सोम्य वाणी थियो झर्किएको किन ?

                  (४)

(श्रग्विणी छन्द)

१७ जेठ २०७१, IMAGE NEWS 103.6 F.M.बाट प्रसारित। 

शावधान। शावधान।।शावधान।।।

मानव ढुङ्गेयुगबाट बिकसितहुँदै आजको यो वैज्ञानिक युगसम्म आइपुगेको हो। यसबीचमा उसले अनेक संघर्ष, खोज र लगनशीलताबाट यो उपलब्धि हाँसिल  गरेको हो। अन्यथा सम्भव थिएन।  आज हामीले जे -जति वस्तु,सुबिधा उपभोग गरिरहेका छौँ यो सबै यसैको प्रतिफल हो। सामान्य टाउको दुख्दा सिटामोल, चराको खुट्टामा बाँधेर पठाउने चिठ्ठी अहिले फोन वा ईमेलबाट, धूलोमा लेख्नुपर्ने क-ख अहिले कम्प्युटरबाट, छाया नापेर वा कुखुरो कराउँदा पत्तालगाउने समय अहिले घडीबाट अनि रूखका बोक्रा लगाउने शरीरमा कपडाले स्थान लिईसकेको छ। तर यो कस्तो अपवाद। साईकलमाथि फलामको बाकशभित्र, पलास्टिकका बट्टामा जडीबुटीभन्दै बेच्दै हिँडेको।जडीबुटीलाई नकार्न सकिदैन तर स्वाथ्य संस्थाको स्वीकृती बिना यो सरासर गलत छ। ''१०१ रोगका एकसे एक अौषधि'' भन्दै स्त्रीका स्तन घटाउने र बढाउने,योनीबाट सेतो पानी बग्ने, पुरुषका लिंगका साइज बढाउने, जण्डिस, मधुमेह,गानो-गोला, सम्पूर्ण रोगको अौषधि यहाँ पाइन्छ भन्दै माइकिंग गरेको। यसको कसरी विस्वास गर्ने? यसले मानवीय स्वाथ्यमा कस्तो असर पार्छ ? यो नबुझिकन यसको प्रयोगले अन्य समस्या उब्जाउँछ। त्यसैले शावधान। शावधान।।शावधान।।। खरीदकर्ताहरू।

यो बन्द होईन

बाटो खाली छ, सुनसान छ। यो बन्द वा हडतालका कारणले होईन।हाम्रो देशमा केहि वर्ष अगाडिसम्म राजा, महाराजा थिए। उनीहरूको बेग्लै शान, रवाफ थियो। कतै सवारी हुनुपर्योभने सडक खाली गराएर मात्र सवारी चलाउथे। नागरिकहरूमा त्यसको मार पर्थ्यो तर अभिव्यक्त गर्न सक्दैनथे। जनता पीडा सहन बाध्य थिए। हाम्रा अग्रजहरू  त्यो कुराको विरोध गर्थे। अहिले जनताको छोरा राष्ट्रको सर्वोच्च पदमा बिराजमान छन्। हिजो उनले जूनकुराको विरोध गरे आज त्यहिकुराको पुनरावृत्ति गरिरहेका छन्। कतै जाँदा सडक नै खाली गराएर। जबकि उनको सवारी साधन धेरै हदसम्म सुरक्षित हुन्छ।यसको प्रत्यक्ष असर सम्पूर्ण नागरिकमा पर्न जान्छ।उनले जनताको पीरमर्कालाई ख्याल गर्नुपर्ने हुन्छ। यदि इज्जत र सम्मान का लागि बाटो खाली गरेको होभने यसको उल्टो असर पर्नसक्छ।उनको यो कार्यले जनतामा कस्तो असर पर्छ, उनीप्रतिको धारणा कस्तो बन्छ ? हेक्का राख्नु आवस्यक छ।